طبعا دي المدونة الأولى ليا في حياتي وأول مرة أكتب مدونة عشان كدة حبيت أمشي على نفس نهج الاساتذة إلي سبقوني سواء في المدونات أو مؤلفي الكتب وطبعا هنا أحب أقول الأستاذ أحمد العسيلي إلي سمى أول كتاب ليه "كتاب مالوش إسم" لكن أنا هسمي الموضوع ده "المقالة الأولى".
الموضوع بسيط وسهل... المهم قصة التدوين دي كانت في دماغي من زمان وعملتها من أكثر من اربع سنين تحديدا في ديسمبر 2006 وما كنتش عارف أكتب إيه ولا أقول ايه وسبتها متشعلقة كدة على النت لغاية ما الحمدلله رجعت لاقيتها سليمة ولا هي اتسرقت ولا حتى اتلم عليها التراب وجالها البرومة.
هكتب و أتفاعل مع الناس إلي أنا ممكن أكون أعرفهم وممكن لأ..وده شيء جميل بالنسبة ليا إني ألاقي حاجة ممكن أطلع فيها الطاقة المتخزنة في دماغي إلي بقت عاملة زي الشوال المقطع..من كتر الأفكار و المواضيع. بس أنا لاحظت إن الأحداث المحيطة و الظروف إلي الواحد بيمر بيها في حياته سواء كانت حلوة أو وحشة بتأثر على الواحد وبتخلي عنده خامة يقدر يشتغل بيها..
كفاية كدة عليكم النهاردة عشان هقوم أديها نوم و ارجع بكرة ابتدي احكي الحكايات بتاعتي وكل إلي أعرفه و كل إلي شفته كمان رأيي في إلي بيحصل أيا كان دين سياسة كنافة فول وطعمية هتكلم في كل حاجة إن شاءالله اتكلم عن البي بي (البلاك بيري) و الباربكيو بشكل عام سواء بإسهاب وممل أو بالمختصر و الشفتشي.
السلام عليكم---لغة المسلمين
بيس العنب—لغة الشارع المحترمة
تصبحوا على خير---الشاب الاستايل
ليست هناك تعليقات:
إرسال تعليق